Баянхонгор
аймгийн Баян-Өндөр сум нь Улаанбаатар хотоос 906 км, аймгийн төвөөс 276
км алслагдан оршдог. Тус сум 1923 онд үүсэн байгуулагдсан. 1689,1
мянган га нутагтай, говийн их ай савд багтдаг. Баруун талаараа
Говь-Алтай аймгийн Эрдэнэ сумтай 292 км, хойд талаараа Баянцагаан сумтай
72 км, зүүн талаараа Шинэжинст сумтай 285 км, өмнөд талаараа
БНХАУ-тай 266 км тус тус хиллэдэг. 2600 хүн амтай, 717 өрхтэй, засаг
захиргааны 5 багт харьяаллагддаг. 154744 толгой малтай, үүнээс адуу
1452, тэмээ 3935, хонь 22652, үхэр 294, ямаа 126411 толгой малыг өсгөн
үржүүлж байна.
Баян-Өндөр сум нь нэн ховордсон ан амьтан, ургамал, байгалийн баялаг элбэгтэй. Монгол улсын Хөдөлмөрийн баатар гурав төрсөн, Улсын сайн малчин 10 гаруйтай ажилсаг, хөдөлмөрч ард түмнээрээ бид бүхэн бахархан омогшдог. Сум маань хөгжин цэцэглэсээр, аймгийн тэргүүний сум болох зорилго төлөвлөгөөтэй ажиллаж байна.
Ард түмний төлөөллийн байгууллага сумын Иргэдийн Төлөөлөгчдийн Хурал нь 21 төлөөлөгчтэй. МАХН 2, МАН 7, АН- аас 11 төлөөлөлтэй. ИТХ-ын дарга, нарийн бичгийн дарга орон тоогоор ажилладаг. Сумын ИТХ-ын тэргүүлэгч гишүүн 7, БИНХ-ын 4 дарга гэсэн бүрэлдэхүүнтэй ажиллаж байна.
ИТХ-ын эрхэм зорилго:
Нутгийн өөрөө удирдах ёсыг бэхжүүлж төлөвшүүлэн, сум орон нутгийнхаа нийгэм эдийн засгийг хөгжүүлэх ард иргэдийнхээ төлөөлөх эрхийг хангахад оршино.
Сумын ИТХ нь орон нутгийн ирээдүйн хөгжлийн бодлогыг тодорхойлон, сумын нийгэм эдийн засгийг хөгжүүлэх цогц төлөвлөгөөг /2013-2023/ батлан ажиллаж байна.Мөн ард иргэдээ соён гэгээрүүлэх, өв уламжлал, ёс заншлаа хадгалан, залуу үеэ өв тэгш хүмүүжилтэй иргэн болгон төлөвшүүлэх төрж өссөн нутагтаа аятай тухтай амьдрах нөхцөл бололцоогоор хангахад бодлого зорилтоо чиглүүлж ажилладаг.
Сум орон нутгийнхаа хөгжлийн төлөө сэтгэл тавин хамтран ажиллаж байгаа байгууллага, хамт олон, ард иргэддээ ажлын амжилт хүсэн ерөөж, цэцэглэн хөгжихийн ерөөл дэвшүүлэе.
Бай-Баян-Өндөрчүүд мандан бадрах болтугай.
БАЯН-ӨНДӨР СУМЫН ИТХ-ЫН ДАРГА Г.ЛХАГВАСҮРЭН